昱君的部落格

這本冊是我佇圖書館發現的，對一開始看著這本冊，我就乎伊吸引，伊的冊名是遮爾吸引我。人攏想欲飛，人攏對自由真向望，當然我嘛是仝款。

     這本冊頂懸寫著一段話講「遷徙，是一種希望; 徙栽，是一種挑戰; 人無翼，猶毋過人也是想欲飛。」遷徙，離開原本家己所了解的所在，是一種新的開始。徙栽，共植物對伊原本生長的環境搬徙去一个無熟似的環境，是一種冒險。人無翼，猶毋過人也是想欲飛。人對古早開始，就想欲像鳥仔仝款佇天頂飛，看覓家己蹛的這个所在，甚至是這个世界到底是生做啥物款？人雖然無翼，猶毋過人有無限的想像力佮創作力，所以人類發明真濟物件，舉例來講，像飛船―飛行機―火箭。人想欲飛，怙著遮的工具會用乎怹去發現這个世界的神秘。看完這本冊，我有另外一種想法，文字會帶阮去發現新世界。

       對作者和旅行當中拄著的人講話當中，我學到真濟物件，嘛熟似了四界的歷史背景，以及了解作者的心境變化。佇外口旅行是為著走揣彼真實的家己。作者講：「流浪慣勢矣，一个城市行過一个城市，走揣啥物我嘛無啥明白，行慣勢矣，跤步停袂落來，明仔載會是啥物款，我臆袂出來，人有跤，會行，無像樹仔，總是停佇遐。毋過欲按怎行，嘛袂離開了土地，所以心內猶原是有根的，有當時仔真正感覺人就親像樹枝，摸袂到天，嘛無法度像鳥仔仝款佇遐飛。轉世變成人，有情有掛礙，嘛是宿命。竟然按呢，就繼續活落去，活較好一點仔。只是活咧，抑是感覺自我的存在，應該有真大的差別。」

我嘛有「想欲飛的翼」，我想的毋是出國，是靠咱的心去飛。咱會透過想像力去創作，乎咱的心成長。身軀是無法度限制咱的想像力。想像力會用蹛咱做伙去飛。飛行機會用飛過萬里，猶毋過無法度超出想像力的翼。心佮想像力就是彼想欲飛的翼。